Fyrirlestur á fimmtudaginn

Jæja gott fólk!

Nú er eitthvað að frétta af okkur túttunum! Á þriðjudaginn lögðum við 1,1 milljón inn á Provide International til sjúkrabílakaupa. Læknanemarnir höfðu lagt inn um 300 þúsund svo saman höfum við lagt inn 1,4 milljón sem verður nýtt til sjúkrabílakaupa. Þetta eigið þið, þið sem lásuð síðuna og lögðu okkur lið. Þessi bíll verður keyptur í ykkar nafni.

Gaman að segja frá því að Jonah Kitheka, framkvæmdarstjóri samtakanna kom til landsins í gær og verður á Íslandi í viku. Það voru læknanemar í HÍ og tannlæknanemar sem stóðu að komu hans hingað og mun hann sitja fundi og halda erindi á meðan dvöl hans stendur. Við héldum smá móttöku fyrir hann í gærkvöldi þar sem við hittumst krakkarnir sem höfum farið út og skelltum saman í smá hlaðborð fyrir karlinn. Það var einhvern veginn hálf súrealískt að sjá hann hér -á Íslandi. Maður var orðinn svo vanur honum á skrifstofunni sinni í skræpóttu skyrtunum sínum drekkandi heitt vatn til að kæla sig og talandi. Já hann Jonah getur sko talað og það er gaman að hlusta á hann. Ein mætti með svið fyrir karlinn og hélt maður að hann yrði pínu sjokkeraður við að sjá hálfan haus þarna á disknum en hann kippti sér ekki upp við það; No no, we eat goat (innskot: Nei! Hvað segiru!). Sheep, goat..same thing!

Skemmtilegast fannst mér að heyra að Martin Forster sem stjórnar fyrirtæki úti sem heitir Cooper Motors styrkti samtökin á dögunum. Ég hringdi í þennan mann og sagði honum frá ástandinu í fátækrahverfinu og fékk fund með honum. Þar sagðist hann svosum geta látið okkur fá þeirra 'sjúkrabíl' ef hann myndi endurnýja þeirra.. Haldið að karlinn hafi ekki gert einmitt það! Provide fékk ágætan sendiferðarbíl, lokaðan, með vél í fullkomnu lagi (enda bílafyrirtæki sem sá um viðhaldið!). Þessi bíll hefur verið notaður og verður notaður á meðan safnað er fyrir restinni upp í sjúkrabílinn. Bíllinn hefur einnig verið mikið notaður í flutning á lyfjum, það er nefnilega rosalegt vandamál með flutning lyfja vegna hárrar tíðni rána. Þegar ekki er hægt að flytja lyf án þess að það sjáist hvað verið er að flytja er voðinn vís. Fyrir þetta erum við ótrúlega þakklátar og glaðar!

Það er alveg magnað hvað margir hafa lagt okkur lið og hjálpað okkur í þessu, takk fyrir okkur!

EN! Nú er komið að fyrirlestrinum sem við erum búin að lofa ykkur! Við ætlum að halda 'opið erindi núna á fimmtudaginn kl 20 í Öskju (húsi raunvísindadeildar HÍ) og er hann opinn öllum.

Vonum að við sjáum ykkur sem flest!

 Liljan

 

Athugasemdir

[Erla (IP-tala skráð) 13.9.2007 kl. 22:16]

Þökkum fyrir boðið á fyrirlesturinn sem var nú í kvöld, við gátum því miður ekki komið en vonumst til að frétta af honum hér á bloggsíðunni eða í Morgunblaðinu.

Kærar kveðjur frá foreldrum Kristínar.